62 रुपयांऐवजी 7 कोटी बिल
उबेरवरुन बुक केला ऑटो
Uber India: सोशल मीडियावर हा व्हिडिओ गेल्यानंतर इंटरनेट युजर्स अनेक कॉमेंट करत आहेत. एका युजर्सने म्हटले आहे, आता उबेरवर ईडीची रेड पडली पाहिजे. आणखी एका युजरने आपला अनुभव शेअर करत उबेरवरुन आलेले 2 कोटी 28 लाख 22 हजार 601 रुपयांचे बिल जोडले आहे
ओला, उबेर बुक करुन अनेक जण शहरांमध्ये प्रवास करत असतात. आपल्या लोकेशनपर्यंत या रिक्षा किंवा टॅक्सी येत असतात. तसेच आपल्या इच्छित स्थळी जाण्यासाठी किती रक्कम लागणार यासंदर्भात माहिती त्यातून मिळत असते. पुणे, मुंबईसह अनेक मोठ्या शहरांमध्ये ही सुविधा आहे. परंतु उबेर रिक्षासंदर्भात एक व्हिडिओ चांगलाच व्हायरल होत आहे. यामध्ये एका छोट्या राईडसाठी सात कोटी बिल दाखवण्यात आले आहे. हे बिल पाहून त्या व्यक्तीला धक्काच बसला. मंगळ ग्रहावरुन तर ती रिक्षा आली ना? असा प्रश्न त्याने केला. हा व्हिडिओ चांगलाच व्हायरल झाला आहे. त्यावर अनेक कॉमेंट येत आहेत.
दीपक तेनगुरिया या व्यक्तीने उबेरवरुन रिक्षा बुक केली. त्याला ज्या स्थळी जायचे होते, त्याचे भाडे जवळपास 62 रुपये येते. परंतु तो लोकेशनवर पोहचल्यावर त्याला धक्काच बसला. त्याला त्या छोट्या राईडसाठी तब्बल 7.66 कोटी रुपये भाडे दाखवण्यात आले. दीपक यांनी हा व्हिडिओ बनवून सोशल मीडियावर टाकला आहे.
